³ÉÈËVRÊÓƵ

Mae’r Ysgol Gwyddorau Amgylcheddol a Naturiol wedi ehangu ei gwaith yn sylweddol i wneud dysgu yn y maes yn fwy hygyrch a chynhwysol i bob myfyriwr, gyda chefnogaeth rhoddion gan gyn-fyfyrwyr drwy Gronfa Bangor.

Dan arweiniad Dr Richard Dallison, Darlithydd mewn Gwyddor yr Amgylchedd, galluogodd y project bedwar myfyriwr intern i greu profiadau maes rhithiol trochol gan ddefnyddio ffotograffiaeth 360°, meddalwedd teithiau rhyngweithiol a thechnolegau rhithrealiti. Dros bedwar mis, aeth y tîm ati i ddigido 14 ymweliad maes ar draws naw modiwl addysgu, gan greu adnoddau sy'n cefnogi dysgu o gyrsiau israddedig blwyddyn gyntaf hyd at raglenni Meistr.

Dywedodd Dr Dallison: 

Mae cefnogaeth Cronfa Bangor wedi bod yn allweddol wrth ehangu cyrhaeddiad darpariaeth teithiau maes rhithiol yr Ysgol. Mae hyn wedi ein helpu i ehangu cyfranogiad mewn gwaith maes, gan alluogi myfyrwyr a allai wynebu rhwystrau fel anabledd, cyfyngiadau ariannol, salwch tymor byr neu gyfyngiadau teithio rhyngwladol i aros mewn cysylltiad â dysgu yn y maes, sy’n rhan hanfodol o'u rhaglenni gradd. Mae'r project hefyd wedi rhoi cyfle i'r pedwar intern ddatblygu sgiliau newydd y tu allan i'w rhaglenni gradd, gan ddarparu profiad gwerthfawr a gwella eu sgiliau trosglwyddadwy a'u cyflogadwyedd. Diolch i'r holl gyn-fyfyrwyr sy'n hael yn eu cefnogaeth o Gronfa Bangor am ein helpu i greu cyfleoedd gwaith maes mwy hygyrch i'n myfyrwyr.

Mae'r teithiau rhithiol yn darparu ffordd arall i fyfyrwyr ymgysylltu â dysgu yn y maes pan nad yw’n bosibl iddynt fod yn bresennol, a hefyd yn caniatáu i'r rhai sy'n cymryd rhan yn y cnawd i ailymweld â lleoliadau a deunyddiau dysgu. Disgwylir i'r adnoddau fod o fudd i gannoedd o fyfyrwyr bob blwyddyn, a byddant yn helpu i wreiddio arferion gwaith maes cynhwysol ar draws y cwricwlwm wrth wella dysgu ac ymgysylltiad.

Dywedodd Leon Jamieson, myfyriwr Daearyddiaeth israddedig: 

Diolch i gefnogaeth cyn-fyfyrwyr am wneud y cyfle hwn yn bosibl. Mae creu adnoddau addysgu yn un o'r sgiliau mwyaf gwerthfawr rydw i wedi’i gael o'r project hwn ac mae wedi cryfhau fy nealltwriaeth o addysgu hygyrch ar gyfer amrywiaeth o fyfyrwyr. Rydw i hefyd wedi mwynhau cydweithio â myfyrwyr a staff, dysgu sut i ddefnyddio meddalwedd newydd, a helpu i greu amgylchedd dysgu mwy cynhwysol.

Ychwanegodd Jacob Watson, myfyriwr MSc drwy Ymchwil mewn Gwyddorau’r Amgylchedd: 

Fe wnaeth y project hwn ehangu fy nealltwriaeth o gydraddoldeb, amrywiaeth a chynhwysiant a dangosodd i mi nad oes dim ond un ateb unigol i hygyrchedd. Mae dylunio cynhwysol effeithiol yn gofyn am ystyried a chydbwyso amrywiaeth o wahanol anghenion.

Gweinyddir Cronfa Bangor gan y Swyddfa Datblygu a Chysylltiadau Cyn-fyfyrwyr ac mae'n cefnogi mentrau sy'n gwella profiad myfyrwyr.