³ÉÈËVRÊÓƵ

Mae myfyrwyr rhyngwladol o Adran Celfyddydau Creadigol Ysgol y Celfyddydau a'r Dyniaethau wedi elwa ar gyfres o weithgareddau ac ymweliadau diwylliannol gyda chefnogaeth Cronfa Cyn-fyfyrwyr Bangor, gan eu helpu i ddatblygu cysylltiadau cryfach â gogledd Cymru a chymuned ehangach Bangor.

Cafodd y project Ymgysylltu Diwylliannol i Fyfyrwyr Rhyngwladol ei sefydlu i gefnogi’r nifer gynyddol o israddedigion rhyngwladol sydd yn yr adran, gan gynnwys myfyrwyr sy'n astudio ar raglenni 2+2 gyda sefydliadau partner yn Tsieina. Drwy gydol y flwyddyn academaidd, bu tua 30 o fyfyrwyr yn cymryd rhan mewn gweithgareddau a gynlluniwyd i’w cyflwyno i ddiwylliant, treftadaeth, cerddoriaeth a thirwedd Cymru.

Fel rhan o’r rhaglen o weithgareddau, buont i weld cyngerdd gan Gerddorfa Genedlaethol Gymreig y BBC ym Mangor, buont i ymweld â Chaernarfon a Chastell Caernarfon, a buont am y dydd yn Llandudno gan fynd i ben y Gogarth ac ar hyd y promenâd. Ynghyd â dysgu am ddiwylliant Cymru, roedd yr ymweliadau’n gyfle i’r myfyrwyr wneud ffrindiau ac ymgartrefu y tu allan i'r ystafell ddosbarth.

Roedd yr adborth a gafwyd gan y myfyrwyr yn sôn am effaith gadarnhaol y project.

Dywedodd Yushan Ye: 

Roedd y daith i Landudno’n bleserus iawn. Mae’r amserlen academaidd yn brysur iawn, a dydyn ni ddim yn cael cyfle’n aml i grwydro'r ardal leol a threulio amser gyda'n gilydd fel grŵp. Rhoddodd y diwrnod gyfle i mi gael dau funud i mi fy hun, mwynhau'r amgylchoedd godidog, a gwerthfawrogi harddwch gogledd Cymru. Rwy'n ddiolchgar iawn i Gronfa Cyn-fyfyrwyr Bangor am wneud hyn yn bosibl.

Soniodd Sher Yeung Hiu am sut y gwnaeth yr ymweliad ysbrydoli eu hymarfer creadigol:

Fel cyfansoddwr, rhoddodd sŵn y môr a’r golygfeydd lawer o ysbrydoliaeth i mi gyda fy ngherddoriaeth. Roedd hefyd yn gyfle gwych i gwrdd â fy nghyd-fyfyrwyr newydd a dod i adnabod ein gilydd yn well. Mae'r daith yma’n enghraifft wych o sut mae Cronfa Cyn-fyfyrwyr Bangor yn mynd y tu hwnt i'r ystafell ddosbarth i gyfoethogi bywyd myfyrwyr.

Fe wnaeth y project helpu myfyrwyr rhyngwladol i ffurfio cyswllt â’r amgylchedd lleol tra cawsant hefyd ymgysylltu â diwylliant a threftadaeth Cymru, gan wella eu llesiant a'u hymdeimlad o berthyn ym Mangor.

Caiff Cronfa Cyn-fyfyrwyr Bangor ei hariannu trwy haelioni cyn-fyfyrwyr a chaiff ei gweinyddu gan y Swyddfa Datblygu a Chysylltiadau Cyn-fyfyrwyr, ac mae'n cefnogi projectau sy'n gwella profiad myfyrwyr ar draws y Brifysgol.