³ÉÈËVRÊÓƵ

Mae ein gradd BA Addysg Gynradd yn cynnwys Statws Athro Cymwysedig (SAC), felly mi fyddi’n graddio'n barod i addysgu yng Nghymru a Lloegr*. Mi fyddi’n cael dy annog i ddechrau gwneud cais am rolau addysgu yn dy flwyddyn olaf, gan gymryd y cam cyffrous hwnnw i dy ddyfodol.

Rydym yn canolbwyntio ar dy baratoi i addysgu yn y byd go iawn. Drwy gymysgedd o ddarlithoedd, seminarau, lleoliadau ysgol ac asesiadau amrywiol, mi fyddi’n meithrin y sgiliau, y wybodaeth a'r hyder i ffynnu yn yr ystafell ddosbarth. Gyda chefnogaeth barhaus drwy gydol dy astudiaethau, mi fyddi’n barod i wneud argraff barhaol o'r diwrnod cyntaf.

*Dylai unigolion sy'n dymuno addysgu y tu allan i Gymru a Lloegr wirio gyda Chorff Proffesiynol Athrawon y wlad dan sylw bod Statws Athro Cymwysedig yn cael ei gydnabod yno ac yn drosglwyddadwy.

Rydym yn cydweithio ag ysgolion cynradd lleol gwych i gyd-ddylunio a chyd-gyflwyno’r dysgu ar ein graddau Addysg Gynradd. Mae hyn yn golygu y byddi’n rhannu dy amser rhwng y brifysgol a'r ysgolion arweiniol, gan weld sut mae damcaniaeth yn cysylltu ag ymarfer go iawn yn yr ystafell ddosbarth. Ym Mhrifysgol Bangor, rydym yma i dy helpu i ddod yn athro meddylgar, hyderus ac adfyfyriol, rhywun sy'n barod i wneud gwahaniaeth o'r diwrnod cyntaf.

Yn ystod dy leoliadau, mi fyddi’n cael dy gefnogi gan fentoriaid profiadol sy'n angerddol am dy helpu i ddatblygu. Mi fyddi’n clywed yn uniongyrchol gan athrawon ar draws yr ysgol, ac yn ennill cipolwg ar eu rolau a'u cyfrifoldebau. Mi fyddi’n mynd ati i arsylwi gwersi, ymuno â theithiau cerdded dysgu, a gweithio gyda grwpiau bach o blant. Bydd y profiadau hyn yn dy helpu i feithrin dy hyder ac yn dy baratoi at fywyd yn yr ystafell ddosbarth. Wrth i ti symud ymlaen, bydd cyfle i ti hefyd arbenigo yn yr ystod oedran sy'n dy ysbrydoli fwyaf.

Ym Mhrifysgol Bangor, mi fedri ddewis astudio dy radd BA Addysg Gynradd yn y Gymraeg neu'r Saesneg. Mae pob ysgol yng Nghymru, ni waeth beth fo'i chategori iaith, yn cyflwyno dysgwyr i iaith, treftadaeth a diwylliant Cymru. Dyna pam ein bod wedi creu rhaglen sy'n dy baratoi i addysgu mewn ystafelloedd dosbarth go iawn, gyda hyder go iawn. Mi fyddi’n cael dy gefnogi gan ymarferwyr iaith profiadol a Mentor Iaith ymroddedig yn ein Hysgolion Arweiniol, a fydd yn cyd-gyflwyno sesiynau Cymraeg diddorol fel rhan o dy hyfforddiant.

Os wyt yn astudio drwy gyfrwng y Gymraeg, mi fyddi’n cryfhau dy sgiliau iaith ac yn ennill profiad mewn ysgolion cyfrwng Cymraeg. Mi fyddi’n dysgu sut i gefnogi datblygiad llythrennedd ac iaith plant yn y Gymraeg a'r Saesneg.

Os wyt yn astudio drwy gyfrwng y Saesneg, mi fyddi’n dal i gael y cyfle i ddatblygu dy sgiliau iaith Gymraeg drwy sesiynau sydd wedi eu teilwra ac sy'n cyd-fynd â dy allu. Mae'r sesiynau hyn yn hwyliog, yn ymarferol, ac wedi eu cynllunio i dy helpu i feithrin sgiliau addysgu dwyieithog, sy'n hanfodol i weithio mewn ysgolion cyfrwng Saesneg ledled Cymru.

P'un a wyt yn rhugl, yn dysgu, neu newydd ddechrau, bydd Prifysgol Bangor yn cefnogi dy daith iaith Gymraeg. Mi fyddi’n graddio'n barod i addysgu, ysbrydoli a gwneud gwahaniaeth mewn ystafelloedd dosbarth yng Nghymru a thu hwnt.

Ym Mhrifysgol Bangor, mae ein darlithwyr yn arweinwyr yn eu meysydd, gan ddod ag ymchwil arloesol yn syth i'r ystafell ddosbarth. O dy ddiwrnod cyntaf un, mi fyddi’n archwilio ffyrdd arloesol ac effeithiol o gefnogi dysgwyr y dyfodol, dan arweiniad arbenigwyr sy'n llunio sut mae addysg yn gweithio heddiw.

Mae gan ein tîm arbenigedd mewn meysydd allweddol megis arweinyddiaeth, anghenion dysgu ychwanegol, cyfathrebu, ieithyddiaeth ac ieithoedd tramor modern. Ac nid damcaniaeth yn unig mohono. Bydd cyfle i ti gymryd rhan mewn projectau ymchwil go iawn yn ystod dy astudiaethau. Drwy gymryd rhan yn gynnar yn dy yrfa, mi fyddi’n ennill yr hyder a'r profiad i wneud gwir effaith ar ddyfodol addysg.

Mae ein lleoliad unigryw yn caniatáu inni fynd ag addysgu y tu hwnt i'r ystafell ddosbarth. Gyda'r Fenai a Pharc Cenedlaethol Eryri ar garreg ein drws, mi fyddi’n cael cyfleoedd anhygoel i archwilio addysg awyr agored.

Yn fwy nag awyr iach, mae dysgu yn yr awyr agored yn ddull addysgu pwerus sy'n hybu llesiant, yn meithrin gwytnwch, ac yn helpu plant i gysylltu â dysgu mewn ffyrdd ystyrlon. Mae hefyd yn dod yn fwyfwy poblogaidd mewn ysgolion, gan helpu pobl ifanc i reoli straen a llywio pwysau bywyd bob dydd megis y cyfryngau cymdeithasol.

Byddwn yn dy addysgu sut i ddefnyddio'r awyr agored i gefnogi pobl ifanc a grymuso plant i gyflawni eu potensial mewn ffyrdd sy'n mynd ymhell y tu hwnt i farciau – trwy waith tîm, dewrder a thosturi.